Cattelyn de Wez demeurant présentement à la maison de Jehan Toutlemonde, dépoes avoir bonne et claer cognition qu'elle estoit cidevant à la maison Ernou Toutlemonde où elle veyt que la vefve Neghel et l'espouse Servaes Henry Moreau estoyent auprès l'une de l'autre et veyt que la vefve Neghel disoit à l'espouse Servaes qu'elle ne soy voloit point combattre à elle, demandoit aussy ladite femme Servaes sy la vefve Neghel vouldroit dire que son enffan eust desrobé son denantrien, respondit ladite vefve Neghel que non mais sy son enffant l'avoit mis quelque part, qu'elle le voulyt rendre de sorte que après ce propos ehu, l'espouse Servaes prinst une pier en sa main et puis la iecta en terre et après ce faict corrat sur la vefve Neghel la ruant en terre, la battant et frappant sur la teste visaige et autre part, tellement qu'elle sangloit par tout le visaige et estoit à demy mort, de sorte q estant tirée la femme dudit Servaes arier de ladite vefve Neghel par ung autre, elle vient auprès de la vefve Neghel et elle l'aidit relever le mieulx q fut possible et estant relevée, dest ladite déposante à l'espouse dudit Servaes comment n'avez-vous point de honte de ainsy at... cest po...., ce à quoy elle respondit ce ne seroy point moindre à une autre sy venoy à poinct. Dist davantaige avoir ehu dire ung Alleman q retiroit vers Walrundt q l'enffan de Servaes Henry Moreau avoit le denantrin de la fille de l'espouse Neghel et point autre.

Mathy, fils Henry Courtconseil .... dépoes .... q cidevant y veyt estant auprès du puits au Tiège q la vefve Neghel et l'espouse Servaes Henry Moreau soy combatoyent l'une à l'autre et de faict tenoit l'espouse dudit Servaes lea vefve dudit Neghel soubs elle et la tiroit par les cheveux et veyt que la vefve Neghel sangloit au visaige, autre choese ne dict.

Maroye, espouse à Baldwin Charlier ... dépoes .... q cidevant elle aloit quér(ir) de l'eau au fossé au Tiège de sorte qu'estant en chemin, elle veyt q l'espouse Servaes Henry Moreau et la relicte de feu Neghel soy combatoyent l'une à l'autre et gisoyent l'une sur l'autre et veyt ladict déposante q la vefve Neghel sangloit en son visaige.

Willaem, fils à feu Williame le Charlier ... dépoes ... q cidevant y estoit présent où l'espouse Servaes Henry Moreau et l'espouse feu Hans Neghel soy combatoyent l'une à l'autre et soy injuroient l'une l'autre, s'appelant l'une l'autre couroing i.... (?) et de faict veyt q l'espouse Servaes tenoit l'espouse feu Neghel soubs elle et q tenoit l'espouse feu Neghel l'espouse Servaes par les cheveux et l'espouse Servaes feroit l'espouse feu Neghel au visaige tellement qu'elle sangloit et disoit à sa fille alle me quér(ir) ung baston affin que nous la desawurrons.

Helwy, espouse à Henry Mathy, ... dépoes ... q cidevant elle veyt q l'espouse Servaes Henry Moreau et l'espouse de feu Hans Neghel soy combatoyent l'une à l'autre et qu'elles gisoyent l'une sur l'autre de sorte que ladicte déposante les alit défaire le mieulx q luy fut possible et veyoit q l'espouse dudit feu Neghel sangloit au visaige.

Henry Mathy ... dépoes ... q cidevant estant en sa maison y veyt q l'espouse Servaes Henry Moreau et l'espouse feu Hans Neghel soy combatoyent l'une l'autre et veyt qu'elles gisoyent l'une sur l'autre/ autre choese ne dict.

Anne, fille de feu mre Colla ... dépoes ... q cidevant quant les Allemans du Comte de Birlemont estoyent logy au pays, elle oyit q ung Alleman passant devant la maison Giele del Griffe, disoit q on ne devoit redemander le denantrin q la fille Barbet le Daglier avoit perdu à autre q à la fille Servaes Henry Moreau, laquelle l'avoit trouvé et levé.

Commentaires:

La bagarre entre les deux femmes se déroule à Tiège, près du «puits». Un des voisins qui témoigne est Henry, fils de Mathy Courtconseil, ce dernier décédé vers 1578. La femme de Henry, Helwich ou Helwy, témoigne également ainsi que leur fils Mathy.

Le pays est en guerre et des Allemands sont casernés dans la ville de Herve.