Lynette fille de feu Collin Fouwaige de Fléron ... dépose q ung jour passé assavoir le jour St Piere au mois de juillet elle a bien cogce q ung appellé Xhocka ayant dansé avec elle le mena boire en la maison quy fut Thassin de Rechen où ql trouvent ledit Christianet tantost ql y furent venu elle oyt q ledit Xhocka dist ql feissent une marchandize assavoir ql feissent bonne chère ensemble et q le premier de leurs deulx quy soy deptiroit hors de ladite maison ql payeroit tout lescot q lon avoit ilec despendu et q lon y despenderoit et ql soy demour les mains dessus et ql ledit Xhocka bevuyt dessus audit Christian leql luy feist raison et bevuyt à ladite déposante, en après veyt ladite déposante ql ledit Christian soy feist attendre sa rapière dont lon demandit sil soy voulloit deptir de là dont il répondit q non, en après oyt ladite déposante q lon disoit q ledit Christian estoit allé couchy dormir.

Jehenne fille de feu Thassin de Rechen ... saccord avec la déposition de Lynette susdite déposante, dist davantaige q le lendemain quant Christian fut levé lon luy demandit ce ql voulloit faire car la bière estoit faillie dont ledit Christian dist q lon allast à Herve dire à Marie son espouse ql en envoyast II ou III tomes ce q fut fait et quant lesdites tomes de bière furent amenées ilec ledit Christian dist qlle ladite bière estoit trop jeusne et ql nen scauroit boire dont il ledit Christian demandit dudit Xhocka sil voulloit aller boire à la maison du Grant Piron dont ledit Xhocka répondit "quen aye je cure" et ny alla point ains demeurit ilec boire ladite jeusne bière et ledit Christian alla boire à la maison dudit Grant Piron délaissant ledit Xhocka ilec à la maison dudit Marthin dont après q lon raporta q ledit ledit Christian estoit retiré vers Herve lon ne tira plus de bière mesme ledit Xhocka dist ql ne voulloit plus boire sur ledit Christian et monta ledit escot XXVIII fls

Maroye seure à Jehenne susdite ... saccord ...

Johan Xhocka ... dépose ... q le jour St Piere au mois de juillet dernièrement passé il fut pnt en la maison quy fut Thassin au lieu de Rechen avec Christian le Braisseur prescript où ils furent tellement daccords q le premier de leurs deux quy deptiroit hors de ladite maison pour raller en sa maison quy payeroit lescot et de faict ledit Xhocka déposant feist appeller ilec en présence dedit Christian les deux filhes de lespouse dudit Marthin desqlles il demandit sil en seroient bien contentes dont ils dirent q ouy et q lon feist bonne chiere car chacun de leurs deulx estoit bon assez pour lescot alhors dist ledit Xhocka q portant q ce nestoit assez qlles sechacheroient tousjours à boire tant q lung de leurs deulx se deptiroit de là pour raller en sa maison dont elles dirent qls en estoient bien contentes, après quoy là mesme ledit déposant prinst ledit Christian p la main et ledit Christian prinst ledit déposant p la main disant chacun deulx p deux fois "je suis bien content", dont après q lon dist audit déposant q ledit Christian sen estoit rallé il en rallit aussy et ne sceit combien lescot a monté sinon ql a oyu dire après coups ql montoit à XXVIII fls.

Sandre fil du feu Sandre delle Vaulx ... dépose ... q le jour St Piere au mois de juillet dernier il fut pnt en la maison quy fut à feu Thassin de Rechen où q Johan Xhocka et Christian Braisseur bevoient delle bière et feirent ung marchiet entre eulx q le premier de leurs deulx quy sen riroit vers sa maison quy payeroit tout lescot desorte ql appellent les hostesses et demandent delles sils en estoient bien contents dont elles répondirent q ouy et q ledit tx déposant bevuyt ilec avec et ne luy demandent point de payer son escot.

Anne espouse Marthin susdit ... dépose ... q le lendemain du marchiet fait dentre Xhocka et ledit Christian et q ledit Christian eu couchy en la maison de ladite déposante et quant on eu esté quérir delle bière à Herve ledit Christian dist q ladite bière estoit trop jeusne et ql ne scavoit boire dont il demandit audit Xhocka sil voulloit aller boir avec luy à la maison de Grant Piron dont ledit Xhocka répondit "quen aye je affaire" tellement q ledit Christian alla boire à la maison dudit Grant Piron et ledit Xhocka ny alla point ains demeura boire de ladite jeusne bière en ladite maison de ladite déposante et après q ledit Christian fut retourné de la maison du Grant Piron à la maison de ladite déposante ladite déposante demanda dudit Christian ql voulloit faire avec ledit escot dont ledit Christian demandit sil saichoit toujours dessus dont ladite déposante répondit q ouy car ils lesdits Xhocka et Christian avoient dit ql estoient bons assez pour ledit escot dont il ledit Christian dist q lon ne tirast plus et ledit Xhocka disoit que lon tirast tousjours suivant leur marchiet.

Jehenne et Maroye filhes de ladite déposante ...

Sandre fil du feu Sandre delle Vaulx ... dépose ... q Xhocka susdit pour ce q le bière estoit jeusne et q Christian nen pouvoit boir donna congy à Christian susdit de aller boire à la maison de Grant Piron mais il ne luy donna point congy (permission) de raller vers sa maison sil ne payoit lescot et q chacun pouvoit aller boire sur ledit escot à la maison dudit Grant Piron dist ql ne veyt point q ledit Xhocka fust quérir les menstrez? ilec pour venir boire mais veyt q Pirlot frère audit Christian fut quérir lesdits menstrez autre chose ne dit.