Jehan le Muzion de Herve ... dépose ... que dimanche dernierement passé, yl estoit beuvant à la maison Jacquemin Beaulhomme après disner environ le soir, avecq plusieurs autres (...) compaignons, où y s'eslevat quelque différen entre Toussainct fils Pacqueau de Hau.evaulx et Lina, beau-fils à feu Jehan Mathy, de sorte que Toussainct susdit parlat sur ung banck auprès de la table, ayant sa rappière nue entre ses mains, et veyt aussy la même instance que Henry Mathy que estoit aussi ens la chambre, se frappit, ayant en ses mains ou une wayen de rappière ou de poignart ou ung autre baston, ne scavoit ledict déposant dire parfaictement de que c'estoit, ny après quy que frappoit et pour cause de science, dit ledit déposant que Mathy occis estoit alhors ens ladite chambre et esteuf.

Colla fils de feu Lina Jehan Colla de Herve, jeusne compaignon, ... dépose ... que dimanche dernièrement passé y estoit beuvant avecq plusieurs autre jeusne compaignons à la maison Jacquemin Beaulhomme, où s'eslevat quelque différen entre Toussainct fils Pasqueau de Hainevaulx et Lina gendre de feu Jehan Mathy, de sorte que Toussainct susit, estant sur la table ou sur le banck, ayant une rappier nue entre ses mains, parloit à Lina prédicte mais ce q disoit, ne scait rien, veyt aussy à la même instance que Symar, fils de feu Symon Servais, estant présent en l'esteuf, ayant ung poignart entre ses mains, mais ne le veyt ni frappe(r) st... ny férir, veyt aussy que Henry Mathy féroit sur Symar, fils de feu Symon Servais, ayant ens ses mains ou une wayem de rapier ou de poignart, ne scavoit parfaitement ce que c'estoit, de sorte que ledicte déposant prinst ledicte Henry Mathy entre ses bras en le faisant aseoir auprès de luy, ce que ledit Henry fist.

Jacq Bauldewin ... dépose ... que dimanche dernièrement passé y estoit beuvant avecq plusieurs autres en l'esteuf Jacq Beaulhomme, environ le soir où y veyt que s'eslevat quelque différen entre aucuns estant en ladite esteuf, de sorte que veyt Toussainct fils Pacqueau de Hainevaulx estant ou sur la table ou sur le banck ayant une rapière nue entre ses mains mais ne le veyt poinct ny frapper ny férir, veyt aussi que Symar fils de feu Symon Servais estant illecq présent avoit ung poignart nu entre ses mains, et veyt que ledit Symar hausit de ledit poignart une fois ou deux mais sy attendit quelcuncq, rien ne scait, de sorte que incontinent après ce faict Mathy fil de feu Mathy Courtconseil s'aprocha de luy criant miséricorde, miséricorde à Dieu, et tombit à l'instance sur ung banck et le veuillant relever, aparceut ledit déposant que le sang luy couloit à grand abondance hors de la bouche et incontinent fut ledit Mathy mort.

Henry le Hartz ... dépose ... que dimanche dernièrement passé y estoit beuvant avecq plusieurs autre en l'esteuf Jacquemin Beaulhomme, environ le soir où estant y veyt que s'eslevat quelque différent entre plusieurs estant en ladite esteuf, de sorte que, entre autres, Toussainct, le fils Pasqueau de Hainevaulx, estoit de deux pieds sur une tables, ayant entre ses mains ung verdin (?) nuz, de sorte que ledicte déposante, avecq Lambert fils Pironnet de Belfontaine et Balduwin fil (?à et Jacq Balduwin saillirent sur ladicte table et tiendrent ledit Toussainct et luy et son verdin, et tenant aussi ledit Toussainct, veyt ledicte déposant que Henry Mathy, Johan le Muzion, Mathy occis et tué, Symar fils de feu Symon Servais feroyent l'ung contre l'autre indifféremment, et veyt aussi alhors que Henry Mathy avoit entre ses mains ou ung wayen (?) de rapier ou ung baston, (et) feroit sur Symar susdit, et avoit alhors Symar susdit ung poignart nu entre ses mains, et bien joest (juste?) après ce veyt que Mathy accis et tué s'aprocha del table s'apoyant, son bras sur la table et sa teste sur sa main, de sorte que voyant ce, s'aprocha de luy demandant qu'est ce... cousin Mathy, lequel respondant dist "je suis ung homme mort", alhors luy demandit ledicte déposant derechef "telles semblaebles parolles que vous l'at fait", sur quoy y respondit que s'avoit esté Symar Symon Servais, alhors voyant ledicte déposant que Hubert (?) se partit d'illecq pour aller quérir Hastenein (?à le chirurgin, de sorte que, estant illecq retourné avecq ledict chirurgin, lequel y avoit esté quéry trouvèrent ledict Mathy mort, et après ce faict et estant retourné en l'esteuf auprès de Mathy mort et occis, ouyt que Jehan le Muzion dist à Henry Mathy que s'avoit esté luy scavoir Henry Mathy que l'avoit faict.

Lambert, fils Pironnet de Belfontaine ... dépose ... que dimanche dernièrement passé, ledicte déposant estoit beuvant avecq plusieurs autres ens l'esteuf Jacquemin Belhomme à Herve, environ le soir où estant, veyt aller à la maison Jacquemin Beaulhomme à Herve, pour rappelle Henry le Harts qui estoit illecq avecq plusieurs autres beuvant, de sorte que, estant entré ens la maison dudit Jacquemin, ouyt que on l'armoit et se combatoit ens l'esteuf, de sorte que veuillant mectre le bien .utra (?) ens ladicte esteuf, ou estant entre, veyt que Toussainct fils Pacqueau de Hainevaulx estoit sur la table de deux pieds, ayant entre ses mains ung verdin nuz et aussi estoyent ens ladite esteuf plusieurs qui feroyent l'ung sur l'autre et, entre aultre, estoient Henry Mathy, Mathy occis et tué, Symar le fils Symon Servaes et Jehan le Muzion, et encor des autres, lesquels ne scavoit dire que c'estoient, et alhors, voyant ce, saillit sur la table pour tenir Toussainct prédict avecq Henry le Harts et Baulduwin fils Willaem le Charlier, et veyt aussy alhors que Symar fils Simon Servaes, avoit ung poignart nuz entre ses mains, férant, frappant et soy defendant avecq ledit poignart, mais ne veyt point ledit déposant que ledit Symar attendist personne avecq ledicte poignart, et tantôt après ce, luy dist Henry le Harts telles parolles "voilà ung homme tué", sur quoy ledict déposant demandit qui c'estoit, lors luy dist ledict Henry que c'estoit Mathy marguerit (?)/ et adoncq et l'instance que saillit ledicte déposant de la table prendant ledit Mathy occis entre ses bras et luy demandant que est-ce Mathy, sur quoy y ne respondit rien et luy sailloit et sortoit alhors grand abondance de sang hors del bouche et des narines, et après ce sortit ledit déposant hors de l'esteuf pour aller appeller le chirurgin.

Jehan, fils de feu Symon Bietran de Coin de Herve, ... dépose ... que dimanche dernièrement passé, y estoit beuvant avecq plusieurs autres ens l'esteuf Jacquemin Belhomme, environ le soir, où estant sorty et rentrant ens ladicte esteuf, veyt que plusieurs feroyent et frapoyent l'ung sur l'autre, entre lesquelles estoyent Henry Mathy, Mathy occis et tué, Symar le fils Symon Servaes et Jehan le Muzion, entre lesquels, Symar susit avoit ung poignart nuz entre ses mains, ferant, frappant et soy défendant, mais à cuy que ledict Symar avoit différen, rien ne scait, et ne veyt poinct que ledicte Symar attendist personne avecq le poignart, et mesme estoit sur la table Toussainct, le fils Pacqueau de Hainevaulx, ayant entre ses mains une rappier ou ung verdin nuz, et tantôt après s'aproche Mathy occis auprès de luy et appuyant son bras sur la table et sa teste sur sa main, veyt que sortoit grand abondance de sang hors de sa bouche, et voyant ce, l'aida tenir, et sortant, ledict déposant, hors de l'esteuf, ouyt dire que ledict Mathy avoit rendu son esprit.

Guilleaume, fils de Jehan de Trou de Herve, ... dépose nihil.

Jacquemin Beaulhomme, brasseur à Herve, ... dépose que dimanche dernièrement passé y avoit en son esteuf plusieurs compaignons qui beuvoient, de sorte que, allant tiré de la bière et le veuillant porter sur l'esteuf, luy dist son espouse que ne rentrast poinct ens ladicte esteuf, car on soy y combatoit, ce que touttefois ledicte déposant fist, et y estant entré, veyt Symar, le fils Symon Servais a..tan de ladite esteuf et les autres d'ung costé et d'autre, de sorte que ledicte déposant prinst ledict Symar entre ses bras et le mist hors de l'esteuf, lequel n'y y entrat plus, et après ce, demandit aux autres q estoyent demeuré dedans sy avoit quelques que veulist faire nulle mael, sur quoy fust respondu que non, adoncq, estant ledict déposant sorty hors de l'esteuf, ouyt que sa femme dist à Lina, gendre Jehan Mathy, lequel voloit remonter ens l'esteuf avecq ung baston, telles parolles "cocquin, que veuclt tu faire illecq quant ce pauvre homme est tué", et après coup veyt ledit déposant que c'estoit Mathy avoit rendu son esprit.

Laurent, fils Laurent Moulin demeurant soubs Herve, ... dépose ... que dimanche dernièrement passé, y estoit avecq plusieurs aultres à la maison Jacquemin Belhomme, environ le soir, où estant veyt que s'esmouua (?) ung différen ens ladite esteuf entre plusieurs, de sorte que après plusieurs débats, ledit déposant veyt Mathy occis et tué que s'apuoit son bras sur la table et son teste sur sa main, quoy voyant ledicte déposant s'a leva arier de Jaecq Bald. que estoit auprès de luy et s'aprocha dudit Mathy occis et voyant qui estoit blessé et que luy sortoit par la bouche et ses narines, luy demandit telles semblaebles parolles, "mon cousin, que vous a donné ce coup" et luy réitéra, ledit déposant, ladite demande par V ou VI fois, lequel Mathy occi, après avoir ehu (entendu?) beaucoup sans rien dire, enfin après avoir regi (?) et jappé hors de sa bouche et de ses narines ung hoppeau de sang, luy dist telles et semblaebles parolles "mon cousin, le fils Symon Servais m'a donné le coup" et incontinent après ce dist n'a (...?) et puis après ne parla plus et rendit aussi l'esprit.