Jacqmin de Ruff, servant à Henry Courconseil, témoin sermenté et examiné, dépose avoir cognoissance avoir esté présent à la danse à ruwe que Mathy fil de feu Massin de Jozé menoit et que ledit Mathy allast devant et ens après et qu'ils allèrent dansant ens la maison de Noël Mangon et ne veyt point que ledit Mathy atouchast ne fist aucun mal à l'espouse dudit Noël et ossy n'oyt point que ladite femme soy doleast qu'on luy eust faict mal.

Maroye fille à feu le jeune Mathy Courtconseil de Herve, sermentée et examinée, dépose qu'elle estoit à la danse que conduysoit Mathy fil Massin de Jozé, et estoit la quatriesme qui suyvoit le susdit Mathy et que quant ils entrèrent ens la maison de Noël Mangon, l'espouse dudit Noël estoit entre l'huis de la maison et la paroi et bouttèrent ladite femme Noël et ledit Mathy l'un contre l'autre à raison que ladite femme ne les vouloit laisser entrer, et mesme que quant ils furent entrés, ladite femme Noël disoit qu'ils ne dansassent ens ladite maison (..) il abatteroroient le chellier (cellier), mais si Mathy fit aucun mal à ladite femme Noël, rien ne sceit.

Anthoine fil de feu Linar le Chappelier...

Massin Coppet de Herve, témoin ... dépose avoir cognoissance que depuis que Catherine, espouse à Noël Mangon de Herve, at eu mal en son bras, Jehenne, espouse à Mathieu Brochette⁽¹⁾/ et auparavant espouse à feu Massin de Jozé et mère à Mathy deffendeur, vient ung jeudy au matin auprès de luy luy pryant qu'il voulist prier à Noël Mangon qu'il marchandist au cirurgin qui avoit médyé sa femme et qu'il fist le semblant qu'il ne povoit rien avoir à celle fin qu'il pouvist faire meilleur marché et que ledit Noël le paiast et elle luy rendroit que Mathieu son maryt n'en scavoit rien car elle ne l'oseroit dire audit Mathieu son maryt.

Marguerite espouse à Robert Merchenier à Herve, sermenté ... dépose qu'elle estoit ung jour passé auprès de la maison de Massin Pirlot et veyt que on dansoit sur le marché et que Mathy fil Massin de Jozé menoit la danse et entrèrent dedens la maison de Noël Mangon mais si ledit Mathy fist mal à l'espouse dudit Noël ou non, rien n'en sceit.

Mathonet Lambert Mangon à Herve ... dépose avoir cognoissance que incontinent après q l'on fit danse en la maison de Noël Mangon, l'espouse dudit Noël vint à la maison dudit déposant soy doléante et déplaignante bien forte en disant qu'on avoit venu danser en sa maison malgré elle et qu'elle tenoit l'huys de sa maison et que Mathy fil de feu Massin de Jozé y vient et bouttit l'huis malgré elle et l'ouvrit et l'avoit encloué entre l'huis et la paroi tellement qu'il luy avoit faict grand mal en son bras et priant audit déposant qu'il voulist avoir regardé à sondit bras cat il y avoit quelque chose qui alloit mal, de sorte que après l'avoir regardé et trouvant à son semblant que la cause n'aloit point bien, il dist à ladite femme qu'elle l'alast monstrer à ung autre cirurgin et qu'il ne se entremettoit point de telles affaires.

Gertrude, espouse à Mathonet Lambert Mangon ... dépose avoir cognoissance que justement après que l'on eut esté danse à la maison de Noël Mangon, l'espouse dudit Noël vient à leur maison soy doléante fort d'un bras, disant que Mathy fil de feu Massin de Jozé avoit entré dansant ens la maison malgré elle et que l'avoit faict mal en ung bras deseur (?) sur l'espaule, priant qu'on y voulsist regarder, de sorte que ladite déposante, à raison qu'elle ny povoit v... print avecq sa main la main de ladite femme Noël et en boutant sa main entre la manche de la chemise et le bras de ladite femme Noël, tastant jusques là hault sur l'espaule et trouvant qu'il y avoit une potalle ens ladite espaule, dest qu'il y avoit quelque chose qui n'aloit point bien, et lui dist qu'elle mettist son bras sur sa teste ou derrière sur son dos, ce qu'elle ne povoit faire. Adoncq dist ladite déposante que ladite femme Noël alast auprès d'un autre cirurgin car il ne soy scavoit entremeler de tels affaires et dist que Noël n'estoit alhors en sa maison.

Marguerite, espouse à Jernot Nopin ... dépose que environ de VIII jours après que l'on avoit faict mal Catharine espouse à Noël Mangon, sy que on disoit/ Jehenne espouse à Mathieu Brochet de Jozé et auparavant espouse à Massin de Jozeit, vient auprès de ladite déposante en l'englise de Herve, demandant ce que falloit la femme de Noël Mangon, dont ladite déposante répondit qu'elle avoit mal en ung bras et qu'elle ne le povoit remuer mais ne scavoit si il estoit rompu ou deslouqué, dont ladite Jehenne dist que on le fist bien médier et que le cirurgin y prinst bon regarde et que son fil chariroit (?) que Mathieu⁽²⁾, son oncle, rien scauroit rien.

Frambach de la Haye...

Lambert fil Mathonet Lambert Mangon ... dépose avoir cognoissance qu'il veyt ung jour passé que Mathy fil de feu Massin de Jozeit menoit une dans à rue sur le marché et veyt qu'il vouloit entrer deden la maison de Noël Mangon et la femme dudit Noël estoit ens sa maison et tenoit l'huys et ne les vouloit laisser entrer et ledit Mathy bouta tant sur l'huys qu'il entra dedens avec cheulx qui dansoient avec luy/ Dépose en outre que ung peu de temps après la femme Noël vient à leur maison disant que Mathy fil de feu Massin de Jozeit luy avoit faict mal en ung bras, dont que après avoir regardé le bras de ladite femme, ils trouvèrent que sur l'espaule dudit bras il y avoit une potalle, dont ils dirent à ladite femme Noël qu'elle allast auprès de maîîte Pierre du Vivier, cirurgin, et qu'il y avoit quelque chose qui n'aloit point bien.

Collar Thoumsin demourant à Soumaigne les mosennes, témoin sermenté ... dépose que as plaidé qual.. (?) de la franchese dernier estant sur la halle, il oyt que Noël Mangon faisoit une parchon de serment à Mathy fil Massin de Jozeit son cousin, dont il dist audit Mathy qu'il ne fist nul serment et qu'il estoit jeune compaignon qu'il en pouroit avoir deshonneur. A quoy ledit Mathy didt qu'il ne jureroit point pour tout Herve qu'il eust faict mal à ladite femme Noël en bras, ny oussy qu'il ne luy eust point faict.

Olivier Johan Bertrand dict de Beur, demourant à Herve, ..., dépose avoir cognoissance qu'il fut cidevant à la maison de Massin Pirlot là qu'on parloit de faire apointement d'entre Noël Mangon et Mathy fil de feu Massin de Jozeit, dont ledit déposant dist qu'il luy faisoit mal dudit Mathyet que c'estoit une mestrimage (?) de sorte que Mathy Johan Mathy illecq estant dist par ledit Mathy fil de feu Massin de Jozeit avoit prié à sa mère qu'elle fist l'apointement d'entre luy et la femme de Noël Mangon et qu'il aimoit myeulx que on luy donnist ung muydt héritaible moin en mariage quant il se marieroit.

Mathy Jehan Mathy, nre coeschevin sermenté ..., dépose avoir cognoissance qu'il fut cidevant choisi et esté comme homme et arbitre de la part de Mathy Brocguet de Jozeit, et Mathy fil à sa femme, pour aidier faire apointement entre Noël Mangon au nom de sa femme, et Mathy fil de la femme dudit Mathieu, de sorte que en arbitrant par ensemble ledit Mathy fil Massin de Jozeit priat à sa mère qu'elle trouvat moyen que ledit apointement fust faict et qu'il vouloit bien que on luy donnist ung muydt héritaible moin en mariage quant il soy mariroit, dist ledit déposant que quant la submission fut faict par les parties susdites, qu'il fut dict que de tout ce que on diroit en traictonant que on ne s'en debvoit aydier devant justice si on ne povoit estre d'accord.

Massin Pirlot, brasseur à Herve, ..., dépose avoir cognoissance que cidevant pendant le présent procès, soy estoit à sa maison pour traicter et accorder le susdit Noël et Mathy fil de feu Massin de Jozeit, ou qu'il oyt que Jehenne, espouse à Mathieu Brocgniet et mère à Mathy susdit, dist qu'elle (...?) bien donner quelque chose et elle fust en paix dudit Noël.

1. Fille de Mathy Courtconseil et Julienne.

2. Mathieu Courtconseil.