... comparurent personnellement Lambert le Daglier de Spa lequel nous at déclaré ... que retournant
hier troisième du courant sur les dix à onze heures du soir pour aller chez luy avecq Philippe Fassar
son camarade et, passant par le marché à l'opposite de la fontaine, certain Franck Remacle Brixhe
demandat qui vat là, à quoy le comparant répondit qu'il le voyoit bien qui alloit là, et là dessus ledit
Francq l'importunat pour avoir du tabacq en poudre et luy ayant ledit comparant encor répondu
qu'il n'en avoit point que sa boite estoit vide s'il vouloit soubs respect chier dedans qu'elle seroit
plaine, et là dessus passat son chemin outre et s'allat asseoir sur les degrez de la maison du
"dragon d'or" pour être hors des importunités dudit Francq, où il tirat son cousteau et hachat du
tabacq pour une pipe pendant quoy ledit Francq revint à luy et le prennant par la main droite luy dit
viens je veu parler à toy sur quoy le comparant se levat et luy dit qu'il estoit homme pour parler
à luy et s'en allant avec luy ainsy tenu par la main et voyant que ledit Francq à ses discours
luy vouloit du mal puis qu'il avoit déjà comencé à le frapper en marchant iceluy comparant là dessus prit
son cousteau qu'il avoit tousjours à la main gauche duquel /: pour éviter l'ultérieur mauvais
traitement qu'il auroit infailliblement receu dudit Francq quy estoit accompagné de son frère et
d'un autre sien camarade :/ il portat un coup au dos dudit Francq duquel il fut renversé par
terre et à même temps perdit la parole à ce qu'il at aprins partant s'il arrivoit que ce coup seroit
assé fatal que la morte s'en ensuivroit ou seroit déjà ensuivie ledit comparant cognoit et confesse par
cette d'avoir perpétré laditte occision ou tel cas, priant au Bon Dieu tout puissant, à toutte la Cour
céleste, au très noble et honoré seigneur le Comte de Lynden gouverneur de la marquisat de
Franchimont et seigneur temporel dudit lieu et à Messieurs de la Justice et à la partie offensée très
humblement pardon et miséricorde ...
... fait et déclaré ... à la maison de moy ledit notaire en franchise de Herve ...
Témoins: Ghe Dolembreux mayeur de Soiron et François Fraipont.